Kanseri y'ibere ikunze kugaragazwa n'ibizamini bikoresha imirasire , bakunze kwita guca mu cyuma (mamography),kuri ubu abashakashatsi babonye ubundi buryo bushobora korohereza abaganga kubona iyi Kanseri. Ubu buryo bukaba ari uburyo bwo gukoresha amaraso y'umuntu hanyuma agapimwa muri Laboratwari ku buryo ashobora kwerekana ko umuntu afite cyangwa adafite Kanseri y'ibere.

Nkuko bitangazwa na the Guardian , Dr James Flanagan , umuganga akaba n'umwarimu mu Ishuri Imperial College of London, mu bwongereza. wayoboye itsinda ry'abakoze ubu bushakashatsi  yavuze ko bamaze kubona isano iba hagati y'indwara ndetse no guhinduka ku duce tumwe tugize insoro z'umweru zo mu maraso bita globules blanc.

Bakoze ubushakashatsi ku bagore bagera kuri 1380, bafite imyaka itandukanye , muri bo abagera kuri 640 bakaba bari barwaye Kanseri y'ibere. Nyuma bakaba baraje gusanga ngo hari isano rikomeye ku gace gato ko ku nsoro z'umweru zo mu maraso bita ATM no kurwara Kanseri y'ibere.

Dr James akaba avuga ko nubwo bisaba Laboratwari zifite ubushobozi buteye imbere, ibi bizafasha abaganga kubona ku buryo bworoshye Kanseri y'ibere.

Ifoto: cramisida.hostoi.com
MANIRAHO Jean De La Paix Fils / UMUGANGA.com