Umuganga.com - Ese ubusanzwe icyo abantu bita urukundo ni iki, ese barukoresha bate?

Ese ubusanzwe icyo abantu bita urukundo ni iki, ese barukoresha bate?

Urukundo, Umubano mwiza, ntabwo ari umukino uwo ari wo wose cyangwa ibirori utumirwamo ukabitaha watwerereye cyangwa utatwerereye ukakirwa. Umubano mwiza ni ikibazo cy’urukundo kandi hagati y’abantu babili barwemeranyeho.

Gukunda bishobora kukuzanira ibyishimo bitagereranywa cyangwa se bikagutera igikomere utigeze uteganya akenshi kidapfa no gukira. Nukunda umuntu uzitegure kuba wamukuraho ibyishimo cyangwa umubabaro. Ni igihembo cyangwa igihombo ugomba kwitegura. Nutita kuri ibyo byombi ntuzigera umenya mu by’ukuri gukunda no gukundwa ibyo ari byo.

Kuba mu rukundo ni uburambe bw’agaciro gahanitse buha uri mu rukundo icyizere cyo kubaho. Gusobanukirwa n’urukundo bisaba kumenya itandukaniro hagati yo kuba mu rukundo n’umuntu no gukunda umuntu.

Kuba mu rukundo n’umuntu ni ugukundana n’umuntu mwabyemeranyeho, mwiyumva ko mwese mukundanye kandi mwabifatiye icyemezo naho ushobora gukunda umuntu ntubimubwire kubera impamvu zitandukanye, ukabigumana mu mutima wawe biravuna cyane.

Urukundo rw’ingurutsi, rw’ibisazi, rw’igihe gito, rujegajega cyangwa rudashinga, rudafatika, ubu bwoko bw’urukundo ni urukundo rw’agahararo kandi ruroroha cyane, nta mbaraga na nkeya rusaba kuko ruba rusa nk’umugenzo gusa,urubamo aba yifitiyemo inyungu runaka kandi arizo agendereye gusa zidashingiye ku rukundo afitiye mugenzi we ahubwo rushingiye ku gahararo amufitiye.
Gukunda umuntu no kuba mu rukundo bisaba imbaraga zihanitse.kurubamo ni ukwiyemeza kuko rugereranywa n’umurimo w’ingufu kandi ruba rufite intego zifatika nziza zigomba guharanirwa kandi zikagerwaho.

Abakundana baba bagomba kugira ubushobozi bwo kwifunguranaho bihagije ku buryo babwirana buri kimwe cyose kuko nta muntu ubaho ujya ubasha gusoma igitekerezo kiri muri mugenzi we ngo akimenye keretse gusa nyirubwite ari we ukivugiye.
Hari igihe uzirengagiza kubwira mugenzi wawe igitekerezo wifitemo wibwira ko azi ibyo utekereza cyangwa abyiyumvamo, uzaba wibeshye kuko nubwo uko mumarana igihe kirekire mukundana hari byinshi agenda amenyaho ku myitwarire yawe abona igihe muri kumwe, ibi ntiwabyizera neza ashobora kwibeshya akaba yafata ibintu uko bitari, icyiza rero ni ukumwibwirira icyo utekereza.
Amahirwe yo gukunda no gukundwa ntagirwa na buri wese hari abayifuza bayabuze ! Ni umugisha k’uyafite !

Wikubahira uwo mukundana uwo wifuza ko aba we ahubwo mwubahire uwo ari we mbere na mbere !

Nta muntu w’indakemwa ubaho, ariko igihe mukundanye by’ukuri muzafashanya gukosorana no gushaka uburyo bwiza bwo kubaho nta n’umwe ubangamiye mugenzi we cyangwa ngo aburire amahoro muri urwo rukundo.

N’ubwo bwose ububasha bw’urukundo rw’ukuri ari ubutagirwa na buri wese, umubano usaba kwiyemeza bidasubirwaho. Bisaba amahame n’imirongo ngenderwaho muri rwo kugira ngo ubashe kurubamo neza kandi urwiyumvamo atari ukurwiyitirira cyangwa kurwihingamo inyuma kandi ku mutima rutakurimo.

Urukundo ni umurimo uhoraho, utajya urangira igihe cyose ururimo, uzahora wiga kuri mugenzi wawe kugira ngo umumenye ku buryo bwimbitse, n’uburyo agenda ahindagurika muri urwo rukundo murimo kandi ikiganiro kikaba inkingi yanyu ya mbere yo kurubamo kuri buri kimwe cyose.

Ifoto: drrae.wordpress.com
KAREKEZI Ray Azades / UMUGANGA.com